Tsage Gaskiya (4)

Daga Saifullahi M Kabir 

 A cigaba da rubutunmu na wannan nazarin da muka fara, da yake yazo daidai da cewa yau 28 ga watan Safar ne, wanda rana mai kamar yau ne aka Shahadantar da Manzon Allah Muhammad (S), ta hanyar guba da aka dura a cikin tsimi da sunan wai magani aka bashi.

 Jiya naje wajen buga irin takardar nan da ake rabawa ‘articles’ mai kunshe da sakon Wafatin Manzon Allah (S), a wajen da ake min aikin, wani ya dauki daya ya zauna ya karance shi tsaf, duk kuwa da yake rubutu ne kanana kuma mai yawa. Kasancewar ‘article’ din ya fi karkata ma bayani akan hana abin rubutu da Umar Dan Khaddabi tare da wasu daga sahabbai suka yi, da kuma bayani akan illar da rashin bada wannan abin rubutun ga Annabi (S) ya jawowa al’ummar Musulmi, kamar dai yadda in mutum yana bibiyan wannan nazarin zai ga mun kawo wasu daga ciki.

 To, bayan ya karance tsaf. Sai yace min, Malam kai Dan Shi’a ne, ko kuwa sun kawo maka aikin ‘printing’ ne? Sai nace masa Ni Musulmi ne, me ya faru? Sai yace, takardar nan koda yake abubuwan da suka fada a cikinta gaskiya ne, amma gaskiyar magana akwai matsala a bayyana irin wadannan Hadisan. Sai nace masa, haba dai Malam. In dai Hadisi ne kuma ingantacce ai ban jin da wani matsala a cikin yada shi. Me yasa Malamanmu suka rubuta a littafinsu tun shekaru daruruwa ko ma dubbai in sun san akwai matsala a sanar da al’umma su. Ni ina ganin wannan yada Hadisan Annabi (S) ne, kuma duk mabiyin Sunnah zai yi farin ciki da hakan.

 Sai Malamin yace min, baka ganin idan jahilai suka karanta wannan takardar za su iya dena ganin girman Sayyidina Umar? Sai nace masa, Radiyallahu Anh! Lallai dai mai sauki ne hakan, amma ni abin da nake gani shine, mu cire komai da komai tukunna, mu dauko zahirin abin, mu saka a faifai. Sayyadina Umar ya zama Sayyadina Umar ne saboda Manzon Allah (S). Kila da bai bi Annabi (S) da ba ma wanda zai san sunansa. Saboda haka tunda ya samu girman da ake ganinsa da shi saboda Manzon Allah (S), idan ya zama ya sabawa Annabi (S) a wani waje, kana ganin Musulmi mai Imani da Allah da Manzon da baya kuskure, zai goyi bayan Umar ya bar goyon bayan Annabi (S) akan sabawarsu? Yace A’a. Amma ai wannan abin a yi shiru ne da shi tunda ya riga ya faru, kuma su Sahabbai sun fi mu sanin dalilin da yasa suka hana Annabi (S) wannan abin rubutun. Ba gashi an ce ciwo ya masa tsanani ba, kaga ko don tausayawa ma za a iya ce masa ya hutar da kansa ba sai ya yi ba. Ni ina ga saboda wannan ne suka hana a bashi.

 Nan nace, Malam kar ka warware imaninka mana. Baka ga sun ce hankalin Annabi (S) ya gushe bane? Wanda yana nufin suna so suce Manzon Allah ya zautu ne zai rubuta musu bata? Alhali yace zai rubuta shiriya ne da in aka rike ba za a taba bacewa ba a bayansa? To idan da gaske Sayyadina Umar da sahabban da suka taya shi hana a ba Annabi abin rubuta shiriya din nan sun yi Imani da Allah da Alkur’anin Allah, ashe ba a cikin Alkur’ani Allah ke cewa: “Abin da Manzo ya zo muku da shi ku rike shi ba, kuma abin da ya hane ku ku hanu ba?” Ashe Allah bai ce akan Annabinsa (S): “Kuma baya furuci bisa son ransa face wahayi da aka masa” ba? Ashe bai kuma ce: “Wanda ya bi Manzo hakika ya bi Allah” ba? Don haka in har sun yi Imani da Alkur’ani wallahi ba za su sabawa Annabi ba.

 Nace, Malam idan kuma kace wai tausayawa ne yasa Umar yace ma Annabi zafin ciwo ya galabaitar da shi kar a bashi. Wai hakan yana tausayawa ne gare shi. Nan ma fadin Umar; “Hasbuna Kitabullah”, wato ‘Littafin Allah ya ishe mu’ ya karyata uzurin cewa suna tausayin Annabi ne. Domin kamar suna cewa ne bamu da bukatar Hadisin Annabi (S), ba su bukatar Sunnar Manzon Allah (S), Littafin Allah kawai ya ishe su, ba sai Annabi ya musu Hadisinsa ba. Wanda wannan kuma in muka ma Umar uzuri a kansa to wajibi ne mu ma duk wani Dan Qala-Qato, masu cewa basu yarda da Hadisai ba a yanzu sai Alkur’ani. Sai ya zama Sayyadina Umar ne farkon shugabansu.

 Muna cikin maganar nan ne mutumin nan ya tubure aka cewa ni dan Shi’a ne, kuma gakiya da ma ya san ni dan Shi’a ne ba zai tsaya yin magana da ni yana bata lokacinsa ba. “Na zaci dan uwana Musulmi ne, ashe kai dan Shi’a ne. Allah ya shiryeku, ya ganar da ku hanya madaidaiciya.” Yace min. Ba wani jayayya sai nace masa, Amin.

 To, labari ya cike mana rubutu yau. Sai nace gaskiyar magana akwai gayar rashin wayewa ga mutum, ya zama kiri-da-muzu ga hujja ana bashi yana bijirewa hujjar. Wani ya taba min magana, yace min, kaga ni ba dan Shi’a bane, amma ina rokonka ka sanar da ni gaskiyar magana, Manzon Allah (S) an kashe shi ne ya yi Shahada ko kuwa ya rasu ne kawai sakamakon rashin lafiya? Sai nace masa, ka nemi Sahihin Bukhari, ka je da shi wajen wani daga cikin Malaman garinku, idan kaje kace ya maka bayani akan Hadisi na 4458 da na 5712 da na 5714 da na 6886 da kuma na 6897. Ya bani labara cewa da yaje, ya budewa Malamin hadisan, sai Malamin ya karanta su kafin ya biya masa, ya koma ga wani ya karanta, ya kuma komawa ga wani ya karanta. Sai yace masa, ‘Yaro, kar ka biyewa wanda suka ce kazo ka karanci wadannan hadisan, ka tafi ka kyale su kawai.’ Karatun da bai masa ba kenan. A lokaci guda sai ya zama hakan da suka yi ne ya sa shi wannan ya fara zargin cewa lallai akwai damuwa kenan.

 Idan ka duba Kilabul Magazi, Babin rashin lafiyar Annabi da Wafatinsa, Hadisi na 4458 a cikin Sahihul Bukhari, daya daga cikin matan Annabi (S), tana cewa; Mun yi masa dure a lokacin rashin lafiyarsa. Sai ya daga hannu yana mana nuni akan ‘Kar ku dura min.’ Sai muka ce, ai an sa mare lafiya dama da kin magani. Yayin da ya farka, sai yace; “Ashe ban hane ku a kan kar ku dura min ba?” Sai muka ce, ai kin magani ne kawai kake irin na mare lafiya. Sai yace da mu: “Kar wata a cikinku ta/ya bar wajen nan face ya sha ko ta sha (abin da kuka bani), kuma ina kallo, in banda Abbas, domin shi bai yi tarayya da ku ba.”

 Me suka durawa Annabi (S)? Aka ce tsumi ne mai dauke da magani a ciki. Me yasa suka dura masa alhali yana cewa kar su dura masa? Sun sabawa Annabi (S) kenan ko? “Wanda ya bi Manzo hakika ya bi Allah.”, “Abin da Manzo ya zo muku da shi ku rike shi, abin da ya hane ku a kansa ku hau.” Inji Allah (T). Ina ce Manzon Allah (S) yace kar su dura masa!? Me yasa suka dura masa!?

 Wata tambayar shine, da yaushe ya daga hannun ya musu nuni da kar su bashi tsimin? Kafin su bada ko? A ruwayar ance; ‘Yayin da ya farka.’ Ya farka daga mene? Kenan da suka bashi ya suma ne ko? Sai bayan da ya farfado sannan yace kar wani ko wata dake dakin su fita face Abbas, domin shi bai san abin da suka kulla ba. Ance Abbas ya shigo ne a lokacin, bashi suka durawa Annabi tsimin.

 An kawo irin wannan hadisin har ila yau lamba ta 5712 a cikin Sahihul Bukhari, Kitabud Dibbu, Babul Ludud. Har ila yau, an kuma kawo irin Hadisin a Babin Diyya, Babin ‘Iza asaba kaumin…’ Hadisi na 6897. Kai, ka duba Babin Kisasi tsakanin mace da namiji a karkashin littafin Diyya, za ka ga irin wanna Hadisin na cewa wasu daga matan Manzon Allah (S) sun dura masa abin da suka kira magani alhali yana musu kashedi akan kar su dura masa. Yana nan a hadisi na 6889. Ko me yasa Imamu Bukhari ya kawo wannan Hadisin a babin Kisasin Oho?

 To, duk ma ba wadannan ba. Wai me yasa Imamu Bukhari bai karishe mana hadisin ba mu ji yadda ta kaya. Da Manzon Allah (S) yace dole kowacce ta sha ko basu sha ba? Da ya kamata a karishe mana ace kowacce bata fita daga dakin ba sai da aka dura mata. Idan an yi hakan. Ko a nan din ma an saba umurnin Manzon Allah (S) ne?

 Muna magana ne da gaskiya. Kuma muna cewa, gaskiyar magana mutane kar su bari a kunkume su a daji. Ya kamata su shigo gari. Mu gane cewa, gaskiyar magana fa wasu da ke kusa da Manzon Allah (S) sun cutar da shi. Kuma ba sau daya ko biyu ba kawai, so da dama suna saba umurninsa ne. Yasha yace ku bani, suce ba za su bada ba. Yace kar ku bani kuma su bashi din. Ya yi su kushe. Ya ki yi su ce don me bai yi ba. Ba kuma ta yadda zai yiwu wadannan da a zahiri suke wa Annabi (S) hakan, mun sani kuma ya zama wai a wajensu za mu karbi addini.

 Za mu karbi addininmu ne a wajen wadannan shugabanni goma sha biyun da Manzon Allah (s) yace za su kasance a bayansa. Kamar yadda ya zo a cikin Sahihul Bukhari, Hadisi na 7222 da na 7223, daga Jabir Dan Samura, yace; Na ji Annabi (S) yana cewa: “Shugabanni goma sha biyu za su kasance.” Sai ya fadi wata kalma da ban ji me yace ba. Sai babana yace, Annabi (S) yace ne; “Dukkansu daga Quraishu suke.” Mun yi Imani da cewa wadannan 12 din sune halifofin Manzon Allah (S), kuma na farkonsu shine Imam Ali (AS) na karshensu Imam Mahdi (AS).


 Ina kara jajantawa al’ummar Musulmi dangane da zagayowar ranar Shahadar Manzon Allah (S). Insha Allah za mu dora da rubutunmu gwargadon yadda hali ya bada.

Tsage Gaskiya (3)

Daga Saifullahi M Kabir 

A rubutun da ya gabata na yi kokarin tunatar da mu yadda suka canza koyarwar Manzon Allah (S) da gangan, sakamakon kin bari ya rubuta mana wannan shiriyar. Ko da yake duk da sun hana rubutun, Manzon Allah (S) ya fada mana abin da zai rubuta, cewa: Bayansa mu yi riko da Iyalan gidansa tsarkaka ne.

 Wani abu da ya kamata mu waiwaya a nan shine, shin sun bi iyalan gidan nasa a bayansa? Shin sun yi riko da iyalan gidan nashi a bayan wafatinsa ne?

Babba a cikin iyalan gidan Manzon Allah (S) it ace Maulatana Sayyida Zahra (SA). Wannan da a hadisi na 3714 a cikin Sahihul Bukhari, aka ruwaito daga Abu Walid, da isnadinsa zuwa ga Miswari Dan Makhrama yace: Manzon Allah (S) yace: “Fatima tsokar jikina ce, duk wanda ya fusata ta, ni ya fusata.” To, sun fusata Fatima (S) din ne, tare da cewa sun san cewa fusata ta fusata Annabi (S) ne. Suna sane da cewa kuma duk wanda Fatima (S) ta yi fushi da shi Manzon Allah (S) na fushi da shi. Kuma fushin Manzon Allah (S) fushin Allah (T) ne.

Malam, bance ka dauko littafin Alkafiy ba, ballantana k ace ai Shi’a ne. Ban kuma ce ka dauko Imama Was- Siyasa ba, bare kace ai bai ingata ba. Wannan Sahihul Bukhari din da ke hannunka nake so ka sake budewa ka je kan Hadisi na 4240 da na 4241, za ka ga ruwaya daga A’isha matar Annabi (S), tace: Fatima ‘yar Annabi (SA) ta aikawa Abubakar da sako tana mai tambayarsa a kan abin da ta gada daga Manzon Allah (S) na daga abin da Allah ya bashi a Madina da Fadak, da kuma abin da ya yi saura daga Kumusin Khaibar. Sai Abubakar yace mata; Ai Manzon Allah (S) yace: ‘Ba a gadonmu! Abin da muka bari sadaka ne…’

Ta cigaba da cewa: Sai Abubakar yaki yaba Fatima komai. Sai Fatima ta yi sabani da Abubakar a kan wannan, (cewa babanta yace ba a gadonsu), sai ta kaurace masa, har ta yi wafati bata sake masa magana ba. Kuma ta rayu ne bayan wafatin babanta da watanni shida. A yayin da ta yi wafati, mijinta Ali ne ya birne ta a cikin dare. Ba a gabatar da Abubakar gareta ba kuma bai sallaci gawarta ba.”

Wannan kunga Nana A’isha ke tabbatar da cewa Fatima ‘yar Annabi (S), wacce Allah ke fushi da fushinta, yake yarda da yardarta ta yi kauracewa Abubakar har ta koma ga Allah bata masa magana. Wato tsawon rabin shekara tana mai kaurace masa. Ba ma kawai hakan ba, har ta yi wafati ta bar wasicci ga mijinta akan ya bizne ta ne da daddare kar ya bari Abubakar ko Umar su sallaci gawarta. Don haka Imam Ali (AS) ya ma tsokar Annabi (S) janaza ya bizne ta a cikin duhun dare ba tare da sun sani din ba.

Wannan ke tabbatar maka da cewa, Sayyida Zahra (S) har ta koma ga Allah tana mai fushi da Abubakar ne, ba kawai da ta yi wafati shikenan ba. A’a, har yau din nan da muke ciki bata bar fushi da shi ba. Kuma kamar yadda aka ruwaito ta fada a wani waje, cewa sai ta kai karansa gaban Manzon Allah (S) a gaban zatin Allah (T) akan cewa sun fusata ta, kuma sun danne hakkinta.

Haka ma a Hadisi na 6726 a Bukharin, aka ce bayan da ta nema yace mata Manzon Allah (S) yace ba a gadonsu… Sai Sayyida Fatima (S) ta kauracewa Abubakar, ba ta sake masa magana ba har ta koma ga Allah (T).

 Duk wadannan kila kace gaba daya hadisan guda uku da na kawo ba a ce ta yi fushi da shi ba, an ce ta kaurace masa ne. Sai nace idan ka kasa bambance ma’anar kauracewa mutum da kuma yin fushi da mutum, ka koma baya zuwa ga Hadisi na 3093, an kawo cewa, da Abubakar yace wa Fatima (SA), ai Manzon Allah (S) yace; “Ba a gadonmu, duk abin da muka bari sadaka ne.” Sai Fatima ‘yar Manzon Allah (S) ta yi fushi, ta kaurace ma Abubakar. Bata gushe ba tana mai kaurace masa har ta yi wafati. Kuma ta rayu ne bayan wafatin mahaifinta da watanni shida.

 Wasu sukan ce to ai Abubakar ya ba Sayyida Zahra (SA) uzurinsa na hana ta gonarta ta Fadak da gadonta na Mahaifinta, da cewa wai Annabi (S) yace ba a gadon Annabawa. Sai nace maka ka tausawa zuciyarka mana, ka zamar da ita mai ‘yantacciyar tunani da nazari. Amfanin hankalin da Allah yam aka ya bambanta ka da dabba shine ka iya gane hankali da rashin hankali ko da rainin hankali.

 Manzon Allah (S) da ya san cewa zai koma ga Allah, kuma ‘yarsa kwara daya da zai bari a Duniya ita ce Fatima (SA), kuma tana da hakkin ya sanar da ita duk wani abu da ya shafeta daga gare shi, don Allah zai yiwu Manzon nan ya tafi ya san ba za a gaje shi ba amma ba zai fadawa wannan ‘yar tasa kwara daya ba? Zai yiwu ya zama ya san cewa ba makawa za ta nemi ta gaje shi, amma sai ya kasa sanar da ita cewa kar ta nemi gadonsa abin da ya bari sadaka ne?

Ka budo Hadisi na 3715 da na 3716 a cikin Sahihin Bukharin da ke hannunka; A’isha matar Manzon Allah (S) tace, Annabi (S) ya kira ‘yarsa Fatima (SA) a lokacin rashin lafiyar da ya yi wafati a cikinta. Sai ya yi magana (cikin sirri) da ita, sai ta yi kuka. Sai ya kuma kiranta ya yi sirri da ita, sai ta yi dariya.’

A’isha ta cigaba da cewa: Sai na tambaye ta akan wannan sirrikan da ya mata (Bayan wafatin Annabi (S). Sai tace min, “Annabi (S) ya sirranta min cewa zai yi wafati a cikin wannan rashin lafiyar da ya yi wafati a cikinsa. Sai na yi kuka. Sai ya kara sirranta min cewa ni ce farkon wacce zan bi shi a cikin iyalan gidansa. Sai na yi dariya.”

 Ashe in har Manzon Allah (S) zai yi wannan sirrin da ‘yarsa, zai mance ya fada mata cewa kuma ba za ki gajeni ba, har sai ta ji a wajen Abubakar, wanda dama kuma kaf cikin sahabbai shi kadai ne kawai ya san da wannan maganar cewa ba a gadon? Ko kana so kace min wannan da Allah (T) ya sanya yardarta da fushinta su zama nashi za ta nemi hakkinta ne bisa karya da zalunci? Kana so kace Sayyida Zahra ta san bata da gadon Manzon Allah (S) amma ta nema a bata? Har ta yi fushi akan hanata da aka yi?

 Na sani, nan wajen ma muhalli ne na rabuwar ra’ayi tsakanin Musulmi, akwai masu ra’ayin cewa Abubakar ke da gaskiya kila kai kana cikinsu, amma ni da masu irin ra’ayina shine tsokar jikin Manzon Allah (S) ce mai gaskiya, kuma ita ke kan daidai, kuma fushin da ta yi da Abubakar ya tabbata a gare shi har abada. Domin da shaidar ‘yarsa A’isha ta ce har Sayyida Zahra (SA) ta koma ga Allah bata dena fushi da shi ba. Kuma fushinta fushin babanta ne, fushin babanta fushin Allah (T) ne. Don haka duk mumini wajibinsa ne ya yi fushi da wanda Allah ke fushi da shi!

 Da sannu za mu zo da bayani a kan yadda kiri da muzu suka shure Imam Ali (AS) daga Khalifancin Manzon Allah (S), suka dauki sarauta, alhali Manzon Allah da kansa a bisa ingantattun ruwayoyi ya tabbatar musu da cewa Imam Ali (AS) ne halifansa a bayansa. Har ma nake cewa, wai ko son zama shugabanni da kuma bukatuwarsu ga cinye dukiyar Annabi (S) da sunan sadaka ne yasa aka kosa Manzon Allah (S) ya bar duniya, har ma aka ruwaito a cikin Sahihin Bukhari wasu na bada labarin cewa sun durawa Annabi magani alhali yana hana su? Suka ki hanuwa, suka dura masa, har ya suma, yayin da ya farka yace ashe ban hana ku akan kar ku dura min ba? Kar dayarku ta bar wajen nan face ta durawa kanta, in banda Abbas, domin shi bai san abin da kuka kulla ba!

 Hadisai ne a cikin Sahihul Bukhari, insha Allah za mu biyo ta wajen a cigaban nasarinmu. Amma ina cewa ne, mutum ya sani, idan zai ma Manzon Allah (S) tawaye da gangan, to ya bi wadanda suka yi hannun riga da koyarwar Manzon Allah (S). Kuma abin da nake fada bai taba zama zagi ba, ina fadan zahiri ne, kuma gaskiya. Kuma dai Allah ya nufa ya zama yanzu mutane sun san gaskiya din ne, in suka ga dama su bi, in suka ga hagu kuma su cigaba da bin son zukatansu.

 A wannan ‘issue’ din, muna bayan Sayyida Fatima (S) ‘Yar Annabi (S), kamar yadda a ‘issue’ din hana abin rubutu muke bayan Manzon Allah (S). Kai a ‘yar wanne kake?

 Zan cigaba insha Allah.

Tsage Gaskiya (2)

Daga Saifullahi M Kabir 

A rubutun da ya gabata, idan mutum yana biye, zai ga cewa mun kawo sabani mai ban takaici da Umar dan Khaddabi ya haifar ga Sahabbai a gaban Manzon Allah (S) a ranar Alhamis din 24 ga Safar, shekara ta 11bh. Wanda wannan sabanin, wanda ya biyo bayan hana Manzon Allah (S), abin rubutu, shi ya jefa al’ummar nan cikin rudu da bin bata, da kauracewa hakikar shiriya. Domin Manzon Allah (S) yace ne; “Zan rubuta muku abin da in kuka yi riko da shi ba za ku taba bata ba har abada.” Kenan idan ba a yi riko da shi ba za a bace. To ina kuma ga ma ba a bari an rubuta din ba? To kun ga sai Umar yace ba za a bayar ba. A kyale Annabi zafin ciwo ke cinsa, ko ma kamar yadda ya zo a wata ruwayar, yace ne Annabi ya fita daga hayyacinsa, littafin Allah ya wadatar da su

 Don haka nake cewa, wannan hana Annabi (S) ya rubuta Hadisi mai muhimmanci wanda yake dauke da wasiyar shiriya ta dindindin, ta tabbatar maka da cewa wanda ya hana din da wanda ya goyi bayan hanawan, dukkansu wasu mutane ne masu boyayyun al’amari a zukatansu. Wato ina cewa ne, ya kamata ka yi tunani, me yasa Umar zai tsaya tsayin-daka yace ba a isa a ba Annabi abin rubutu a wanan lokacin da ya nema ba? Anya zai zama haka kawai ne ba wani abin shi da wadanda suka goyi bayansa a wajen suke gudu ba? Mene ne wannan abin? Muna da bukatar mu ji shi ko?

 Kar a manta, hadisan da muka kawo a rubutun da ya gabata dangane da jayayyar Umar ga Annabi (S) gaba daya daga littafin Sahihin Bukhari ne, mun kawo Hadisi na 114 da na 3053 da 4431 da 4432 da 5669 da na 7366. Allah ya so ya zama wannan batun bai buya ga al’ummar Muhammad (S) ba, cewa Umar dan Khaddabi ne ya shiga tsakanin shiriyarsu da Mai shiryarwa. Kamar yadda Ibn Abbas (RA) ke cewa: “Mafi munin abin bakin ciki shine abin da ya shiga tsakanin Manzon Allah (S) da rubutunsa na shiriya.” Kuma ba komai bane wannan abin da ya shiga tsakanin face Umar din da ya hana Annabi (S) da wadanda suka goyi bayansa.

 Kar kace ina ta cewa Umar, Umar, Umar bance Sayyadina ko abin da ya kamaci haka ba. Ina magana ne akan shi a gaban Manzon da babu wani Sayyid a gabansa a duk talikai. Ina magana ne akan Umar a yayin da ya sabawa Shugaba (S) da gangan, saboda abin da suka boye a zukatansu na cewa ba su so ya zama shiriya ta tabbata a cikin wannan al’ummar ba, sun ma kansu alkawarin ba makawa sai sun canza duk wani abu da yake daidai da yadda Annabi (S) ya zo da shi. Kamar yadda kuma sun yi iyakar kokarinsu wajen ganin sun canza addinin nan a bayan Manzon Allah (S).

 Inda za ka san cewa hana Annabi yin rubutun nan ya jawo halakar da yawa daga ‘yan wannan al’ummar, ka shiga cikin Sahihul Bukhari ka binciko hadisi mai lamba ta 530, daga Abu Rawwada, dan uwan Abdul’azeez, yace; Na ji Zuhri yana cewa: Wata rana na shiga wajen Anas Dan Malik (hadimin Manzon Allah (S) a garin Dimashk, sai na tarar da shi yana kuka. Sai nace da shi me yasa kake kuka? Sai yace min; ‘Ban san wani abu daga abubuwan da na riska a lokacin Manzon Allah (S) da yanzu yake nan (a yadda yake) ba in banda wannan Sallar, kuma ita ma sallar an canza ta!’

 Innalillahi wa inna ilaihi raji’un! Ku duba ku gani, Sahabi ke kuka, shekara kasa da 30 daga wafatin Manzon Allah (S), amma yana ba da tabbacin cewa duk wani abu da Manzon Allah (S) ya koyar na ibada, hatta sallah da ake yinta kullum sai da aka canza ta daga irin wacce Manzon Allah (S) yake yi kuma ya koyar. Malam, ina kuma ga kai yanzu da kake cikin shekara ta kusan 1330 bayan wafatin Manzon Allah (S)?

Hadisi na 529 a cikin Buharin dai, daga Anas din, yace; “Ban san wani abu da yake a zamanin Manzon Allah (S) wanda yake a yanzu (a yadda yake a da din) ba.” Sai aka ce da shi, ga Sallah. Sai yace; “Ashe ba ku canza abin da kuka canza a cikinta ba!?”

Masu tambayar nashi fa Sahabbai ne suma, sun ga Annabi (S), sun yi Sallah tare da Annabi (S), amma an wayi gari a kasa da shekaru 30 da wafatin Annabi (S) halifofin da suka mulki al’ummar Annabi sun tilasta canza wasu abubuwa daga yadda suke a hakika. Muna iya cewa sun canza koyarwar Manzon Allah (S) zuwa abin da suka ga dama. Sai aka wayi gari Sahabbai ma sun dena yin irin ibadar Manzon Allah (S). Ina kuma ga tabi’ai da mabiyansu har zuwa yau da muke?

Kun ga shiriyar da Annabi ya so ya rubuta din nan wacce da Umar da wasu daga Sahabbai sun bari ya rubuta mana, kuma suka bar al’umma suka bi, da ba a kai ga wannan baganniyar ba. Amma da suka hana, sai ya zama Manzon Allah (S) ya fadi wasiyyar da baki, nan ma kamar yadda suka kawo a cikin Hadisi na 4431 a cikin Bukhari, sai aka ce wai Annabi (S) ya yi wasiyya da abubuwa guda uku ne, aka fadi guda biyu aka ce wai an mance wasiyya ta uku da ya yi.

Har mukan ce, don Allah kar a mai da mu wawaye mana. Ace Manzon Allah (S) da kansa ya yi wasiyya da abubuwa kwara uku kacal, amma duk wadanda suke wajen ace guda biyu suka iya tunawa sun mance na karshen? Ashe da ace Annabi (S) ya yi wasiyya da abubuwa 313 ne bai zama wajibi a kiyaye su ba? Ballantana guda uku kacal!? Da sannu za mu zo da bayanin wasiyyar da Annabi (S) ya yi ta ukun da aka ce an mance ta. Wacce ita ce ya so ya rubuta ta ma don tabbatarwa. Wannan wasiyyar kuwa itace riko da Imam Ali (AS) a bayansa, domin shi ba zai taba canza addininsa ba har abada! Don haka riko da shi da koyi da shi a bayan Manzon Allah (S) ne kawai shiriyar da za ta wanzar ma da mutum imaninsa har abada.

Ba ku ji ba? Har a lokacin da aka canza komai din, Sahabban Annabi (S) suka koma yin ibada irin wanda sarakuna suka amince da su yi. Imam Ali (AS) ne da kadan din da suke bi shi suka cigaba da yin duk wata ibada irin yadda Annabi (S) ya yi.

Hadisi na 784 a cikin Bukhari, daga Imrana bin Husyn, yace: Mun yi salla tare da Aliyu dan Abudalib (RA) a garin Basra. Sai muka ce: Wannan mutumin (wato Imam Ali) ya tuna mana da irin sallar da muke yi tare da Manzon Allah (S). A nan muka tuna cewa Manzon Allah (S) fa idan yana sallah, yana yin kabbara a duk lokacin da ya dago ko ya duka.”

Hadisi na 786 da na 826 duk a Sahihul Bukhari din, daga Mudarrif dan Abdullahi, yace; Mun yi salla a bayan Aliyu Dan Abudalib (RA) ni da Imrana Dan Husyn. (Ali) ya kasance idan zai yi sujada yana yin kabbara, idan ya dago daga sujada yana yin kabbara, idan zai tashi daga raka’a ta biyu yana kabbara. A yayin da muka idar da sallar. Sai Imran Dan Husyn ya kama hannuna yace; Hakika wannan (suna nufin Imam Ali) ya tuna min da sallar Manzon Allah (S). Ko kuma yace ne; “Hakika ya yi mana irin sallar Manzon Allah (S).”

Ya kai ma’abocin neman shiriya, don Allah ka yi nazari a karan kanka akan wannan al’amarin. Nan fa dukkansu da mai sallar da masu bin sallar Sahabban Manzon Allah (S) ne, sun yi sallah a bayansa, amma kalli yadda mafiya yawansu suka mance ma da yadda Annabi (S) yake Sallah sai da suka gani Imam Ali (AS) yana yi, sannan suka tuna cewa ashe fa ga yadda Annabi (S) yake yin Sallarsa. To, don Allah, da sallar wa suke yi kenan?

Malam, wadannan sune fa wadanda suka ruwaitowa al’ummar Annabi addinin Annabi. Dubi yadda har sallah ma su kansu ba suna yin irin na Annabin (S) bane, ina kuma ga kai yanzu? Amma kun ga sun ba da shaidar Imam Ali (AS) na yin salla ne irin yadda Annabi (S) ke yi ko? To kuma don me za ka bi wadanda suka dena yin irin ibadar Manzon Allah (S) ka bar wanda yake yin irin na Annabi (S)?

 Ashe za mu zama ababen zargi a wajen mai hankali, idan muka ce ba za mu bi wadanda suka hana Annabi ya rubuta mana tabbatacciyar shiriya ba? Idan muka ce mun ki mu koyi addini daga wadanda suka dena yin irin ibadar Manzon Allah (S)? Abin mamaki yanzu idan wanda ake kira Shi’a, mabiyin Imam Ali (AS) ya zo yana Sallah, tun daga alwala za ka ga mutane suna nuna shi, suna cewa dubi yadda yake alwala. Malam! An canza addininka ne daga koyarwar Annabi (S), mu kuma muna yin addini da ibada ne irin wanda kofar ilimin Manzon Allah (S) ya ruwaito mana, ‘ya’yansa suka koyar da mu.

Na tsaya wani misali har rubutun nawa ya yi tsawo yau ma. Sai nace gaskiyar magana ni dai bani ba wanda ya yi jayayya da Manzon Allah (S) akan rubuta mana shiriya, wallahi ina fada maka GASKIYA ne cewa ban sonsa, ban kuma goyon bayansa, ina son Annabi (S) ne, kuma ina goyon bayan Annabi (S) ne! Allah ya riga ya tsare; amma wallahi idan da Annabi Adamu, ko Ibraheem ko Isa (AS) waninsu zai sabawa Annabi Muhammad (S) akan wata magana bare umurni, da ba zan bi su ba, b azan so su ba, kuma b azan musu uzuri ba. (Sun kubuta daga aikata hakan), to, ballantana wani da ba ma waliyi bane, bisa shaidar ruwayoyi ma yana cikin Jahilan cikin sahabban Mazon Allah (S) kamar yadda za mu ji a can gaba.

Kuma da sannu za mu ji cewa ba a ranar Alhamis din nan ne kawai ya fara jayayya da Annabi (S) ba, ingantattun ruwayoyi a cikin Sahihul Bukhari sun tabbatar da cewa har cin-kwala (shake) Manzon Allah (S) ya taba yi. Muhammad (S) ne Annabina kuma shine abin riko na.

Za mu cigaba insha Allah.

Tsage Gaskiya (1)

Daga Saifullahi M Kabir

Ina fara wannan rubutu da sunan Ubangijin da ya yi ma AnnabinSa (S) shaida a cikin littafinSa mai tsarki da cewa: “Kuma baya furuci bisa son ransa, face (duk abin da ya fada) wahayi ne aka yi a gare shi.” Allah (T) da yake wasiyya ga Muminai a cikin Alkur’ani da cewa: “Abin da Manzo (S) ya zo muku da shi ku rike shi, kuma abin da ya haneku a kansa ku hanu.”

SalatinKa Allah da na Mala’ikunKa da na Muminai baki-daya, su kara ninkuwa ga wannan Annabin naKa, zababbe, wanda Ka saukar dangane da shi a cikin Alkur’aninKa mai tsarki kana yabonsa da cewa: “Kuma lallai Kai (Annabi) kana bisa dabi'u masu girma.” Ka kuma yi masa garkuwa daga masu jingina masa gushewar hankali, a yayin da Kake cewa: “Kuma sahibinku (Annabi (S) ba mahaukaci bane!”

Muhimmi kuma mafi girman jaje da Ta’aziyya gare ku baki-daya, dangane da zagayowar lokacin Shahadar Manzon Allah Muhammad (S), wanda ya zo a cikin ingantattun ruwayoyi cewa ta kasance ne a ranar 28 ga watan Safar din shekara ta 11 bayan Hijira.

Yau muna 24 ne ga watan Safar, 1439bh. Wanda rana ce da tarihi ba zai taba mancewa da ita, ko ya kyaleta ta rika zuwa tana wucewa ba tare da raya musiba da ambaton bala’in da ta kunsa ba. Domin kuwa a irin wannan ranar ne na 24 ga Safar, 11bh aka shiga tsakanin Annabi (S) da wanzarwa al’ummarsa dauwamammiyar shiriya. A rana mai kamar yau 24 ga Safar ne aka tabbatarwa da Manzon Allah (S) cewa ba za a taba bari shiriyar da ya zo da ita ta wanzu a kan gaba dayan al’ummarsa ba sai ga ‘yan kadan daga cikinsu, wanda muna fatan Allah ya sa muna cikin kadan masu riko da shiriyar nan.

Ranar 24 ga watan Safar, wanda a wancan shekarar ta 11 bayan hijira, ta kasance ranar Alhamis ne, ta kasance ranar da kamar yadda Ibn Abbas (RA) ke siffata ta, da ranar da mafi bakin cikin abin bakin-ciki ya auku.

A yayin da muke magana da al’umma, mu kan yi iyakan kokarinmu wajen ganin mun yi magana da su ne bisa hujja daga littatafan da suka aminta da su, don idan abin mu ce a cikin littafin Allama Majlisi ya kawo cewa, kaza da kaza ne. Ahlussunnah zai ce, ina ruwanmu da tatsuniyar Shi’a!? Amma idan kace ma Ahlussunah Imaminsa Bukhari ya fada a cikin Sahihinsa. Yanzun nan zai ce, Na’am! Me yace? To a nan, duk girma da nauyin maganar, zai yarda da ita, sai dai kawai idan ta saba da son zuciyarsa ta kau da kai daga shiriyar da kake kokarin haska masa a ciki.

Wana yasa na yi kokarin ya zama na yi wannan rubutun ne bisa rinjayar da dogarona ga Hadisan da Imamin Ahlussunah, Bukhari ya kawo su a cikin ingantaccen littafinsa da aka fi sani da Sahihul Bukhari. A yayin da madogarar da ke biye da shi dan’uwansa ne Muslim a cikin Sahihinsa shima. Ina fatan mai karatu zai bude zuciyarsa ne ya yi ta bina tare da karbar gaskiyar da ke cikin wannan rubutun, har i zuwa kashin karshe da ban san ina ne birki na ba.

Ina magana a kan ranar Alhamis, 24 ga Safar, shekara ta 11 bayan hijirar Annabi (S) me ya faru a wannan ranar?

Dauko littafin Sahihul Bukhari, imma wand aka saya da kudinka, ko wand aka gada, ko kuma ma ka aro daga wani a unguwarku, ka bude ka lalubo Hadisi na 4431 da na 4432, bayan duk isnadin da aka jero a karkashin wadannan Hadisai guda biyu wanda ya tuke zuwa ga Abdullahi Ibn Abbas (RA), za ka ga yana cewa:

“Ranar Alhamis! Ko ka san abin da ya faru a ranar Alhamis din? Yace: Itace ranar da rashin lafiyar Annabi (S) ta tsananta. Sai Annabi (S) yace: “Ku kawo min abin rubutu na rubuta muku rubutun da ba za ku taba bata a bayansa ba har abada.”

 Na katse hadisin na muku tambaya? Wannan me Manzon Allah (S) ya yi? Kila ku ce min umurni ko? Su wa ya umurta? Kila kace min Sahabban da a gabansu Allah (T) ya saukar da cewa: ‘Abin da Manzo ya zo muku da shi ku rike shi’ ko? Yanzu Annabi (S) ya zo musu da umurnin cewa su bashi abin rubutu. Me ya hau kan duk wadanda suke cikin wajen su yi? Su bi umurnin nan su bashi ko? To sun bashi? Mu cigaba da Hadisin mu ji.

Ibn Abbas yace; Sai suka yi jayayya, kuma bai cancanta su yi jayayya a gaban Annabi (S) ba! Sai suka ce; “Me ya dameku da shi? Ya fita hayyacinsa!” Inna lillahi wa inna ilaihi Raji’un!

To, su waye suka yi jayayyar? A kan me suka yi jayayya? Kuma da wa suka yi jayayya din? Ibn Abbas ya bamu amsar a Hadisi na 5669, a cikin Sahihul Bukhari.

Hadisi na 5669, Hadisin Ibrahim bin Musa da Isinadinsa na mutane 7 wanda ya tuke izuwa ga Abdullahi Dan Abbas (RA), yace: “Yayin da ajali ya fuskato Manzon Allah (S), a dakin akwai mazaje (Sahabbai), daga cikinsu akwai Umar dan Khaddabi, sai Manzon Allah (S) yace; ‘Ku kusantoni (da abin rubutu) na rubuta muku rubutu wanda ba za ku bace ba a bayansa.’ Sai Umar yace: ‘Lallai rashin lafiya ya galabaitar da Annabi, kuma a wajenku akwai Alkur’ani, Littafin Allah ya wadatar da mu!’

Na kara tsayar da mu a nan na nemi karin bayani; Shin Manzon Allah (S) bai san cewa akai Alkur’ani bane yace a bashi abin rubutun ya rubuta wasiyya? Ba a cikin Alkur’ani din ne Allah ya yi ma Muminai umurni da barin wasiyya ba? Ina fadin Allah (T), cewa Manzon Allah (S) baya furuci bisa son ransa, face duk abin da ya fada wahayi ne aka masa? Ashe umurnin Annabi (S) ba abin bi bane a kowane hali? To me yasa Umar ya hana, ya kuma bai yi shiru ba ma har sai da yake fadawa mutane a gaban Annabi cewa Alkur’ani ya ishe su? Basu bukatar shiriyar da Annabi zai rubuta musu kenan?

A cigaban Hadisin, Ibn Abbas yace: (Da Umar ya fadi hakan), Sai mutanen da ke cikin dakin suka samu sabani, (suka rabu gida biyu), suna masu husuma da junansu. Daga cikinsu akwai masu cewa; ‘Ku kawo wa Manzon Allah (S) ya rubuta muku abin da ba za ku bace ba a bayansa.’ Daga cikinsu kuma akwai masu cewa abin da Umar yace. (Wato kar a bayar, zafin ciwo ne ke damun Manzon Allah (S)).

Tambaya; Ashe Allah (T) bai ce; “Baku da zabi (Ku Muminai) idan Allah da ManzonSa suka yi hukunci akan wani al’amari” ba? Yanzu har Manzon Allah (S) yace a bashi, wani yace ba za a bada ba! Ba a da bukata! Littafin Allah ya isa! Kuma Mumini, ace mumininma Sahabi a gaban Annabi ya goyi bayan mai sabawa Annabi din nan, har ya zama akwai bangaren Manzon Allah da bangaren Umar? Wane ne Umar da za ku bi ra’ayinsa ku bar umurnin Manzon Allah, in dai kun yi Imani da Allah da ManzonSa!?

Dan Abbas ya cigaba da cewa: Yayin da wargi da sabaninsu ya yawaita a gaban Manzon Allah (S), sai Annabi (S) yace dasu; ‘Ku tashi daga gareni (ku fice min)!”

A Hadisin aka karkare da cewa, Ubaidullahi yace; Ibn Abbas (RA) ya kasance yana cewa “Mafi girman dukkan abin bakin ciki shine abin da ya katange tsakanin Manzon Allah (S) da ya rubuta musu wannan rubutun, saboda sabaninsu da kuma warginsu.”

Akwai shigen hadisin da ya gabata, hadisi na 7366. Haka ma a Hadisi na 114 a cikin Bukhari din, makamancin wanda ya gabata, Manzon Allah (S) yace musu ne; “Ku fice daga gare ni, domin bai cancanta ku yi jayayya a gabana ba!” Sai Ibn Abbas ya fito, yana cewa: “Mafi bakin cikin abin bakin ciki, shine abin da ya shiga tsakanin Manzon Allah (S) da rubutunsa.”
A hadisi na 3053 a Sahihul Bukhari, Ibn Abbas yace, bayan da suka yi jayayyan, wasu daga cikinsu sai suka ce: ‘Hankalin Manzon Allah (S) ya gushe!’ Manzon Allah (S) sai yace musu; “Ku kyale ni, abin da nake a kansa ya fi abin da kuke jingina min” (Wato ni ba hauka nake yi ba, na san abin da nake fadi muku).

Ya kai Musulmi mai Imani! Har yanzu duniyar Musulmi suna rabe ne gida biyu, gado daga Sahabban da ke cikin wannan dakin. Har yau din nan da masu goyon bayan Manzon Allah (S) ne da kuma masu goyon bayan abin da Umar yace ga Annabi (S); cewa zafin ciwo ya rinjaye shi; cewa hankalinsa ya gushe; cewa ba mu da bukatar abin da zai rubuta mana; cewa a tare da ku akwai Alkur’ani, ya ishemu daga abin da Manzon Allah (S) zai rubuta mana! Tir!!! Kai a wanne bangare kake?

Wannan ba zagin Sahabbai bane, in ka fahimce shi a zagin Sahabbai ko raina su, sai nace ka fara komar da laifi ga Imaminka Bukhari da ya ruwaito abin da sahabban suka aikata daga bakin sahabi Ibn Abbas. Amma wallahi muna fada ne don mutum ya farka. Ya fahimci cewa addinin nan fa na Musulunci, Allah ne ya aiko Annabi Muhammadu (S) da shi, kuma ya wajabta a bi shi a kowace lahazar rayuwarsa da bayan ransa, kuma ya sanya sabawa Annabin nan a matsayin saba masa a yayin da yace: “Wanda ya bi Manzo hakika ya bi Allah.”

Idan har ta bayyana wasu gungun Sahabban Annabi (S) sun saba masa, ba kawai saba masa masa ba, sun ji ma jayayya da shi, ba kawai jayayya ba har fito-na-fito sun yi da shi, yace kaza su ce kaza ne, kamar yadda za mu ci a can gaba a cikin wannan nazarin, don me za su zama maka abin bi? Ashe Allah (T) bai ce; “Babu biyayya ga halitta a kan sabawa Allah ba?”

Hana abin rubutu da Umar tare da wasu gungun sahabbai suka yi, har ta kai ga Annabi (S) ya yi fushi da su yace su tashi daga kansa su fice su bashi waje, ba sabawa Allah bane? Don me suka zama maka abin bi a yanzu!?

Me yasa suka yi abin da suka yi a wannan lokacin? Shin sun yi makamancinsa kafin rannan? Me suka aikata bayan hanawan? Meye ra’ayi da isharar Manzon Allah (S) akan su a bayansa?

Insha Allah a cigaban rubutunmu za mu ji su.

DARAJOJIN IMAM ALI (AS) DAGA BAKIN UMAR DAN KHADDABI (R)

An ruwaito a cikin littafin Riyadun-Nadarat, jildi 2, shafi 226 daga Umar ‘Dan Khaddabi yana cewa: Na shaida cewa naji Manzon Allah (S) yana cewa: “Da ace sammai bakwai da kassai bakwai zasu kasance a gefe daya, shi kuma Imanin Ali ‘Dan Abidalib a aje shi a gefe daya, da Imanin Ali ya rinjaye sammai bakwai da kassai bakwai da abin da ke cikinsu”.

An kuma samu a littafin Yunabi’ul-Muwadda, shafi 249 Daga Umar dan Khaddabi, ya daukaka shi daga Manzon Allah (S) yace: “Da ace dukkan tekuna tawadda ne, kuma itace alkaluma ne, mutane kuma marubuta ne, aljanu masu tattarawa ne, ba zasu iya kiyaye dukkan darajojinka ba ya kai Baban Hasan (Ali)”. 

Muhibbud-Dabariy as-Shafi’iy ya kawo a littafinsa ‘Zaka’iru-Ukba’ shafi na 89 daga Umar ‘Dan Khaddabi yace, Naji Manzon Allah (S) yana cewa Ali (AS); “Ya kai Ali, hannunka da nawa zamu shiga (Aljanna) tare ta inda na shiga a ranar Alkiyama”.

A cikin littafin ‘Kaukabud-Durriy’ shafi na 125, daga Umar ‘Dan Kaddabi yace, Manzon Allah (S) yace: “Duk wanda ya ke sonka ya Ali, ya kasance tare da Annabawa a darajarsu a ranar Alkiyama, kuma duk wanda ya mutu da kinka, ya so ya mace a Bayahude ko Banasare!”.

A wani hadisi mai kama da wannan da Muattakal-Hindiy ya kawo a littafinsa ‘Kanzul-ummal’ jildi 6, shafi 154, yace ya nakalto daga littafin ‘Majma’ul Kabir’ na Dabari, da ‘Tarikhul Kabir’ na Ibn Asakir, da isnadinsu daga Manzon Allah (S) yace: “Na yi ma duk wanda ya yi Imani da ni kuma ya gasgata ni wasiyya da riko da Wilayar Ali ‘Dan Abidalib. Duk wanda ya bi shi ni yabi, duk wanda ya bi ne ya bi Allah. Duk wanda yake son shi ni yake so, duk wanda yake so na ya so Allah. Wanda kuwa ya fusata shi ni ya fusata, kuma wanda ya fusata ni ya fusata Allah Mai Girma da Daukaka”.

A cikin littafin ‘Sawa’iku Muhri’ka’ shafi 109, daga Umar dan Khaddabi yana cewa: “…Ku sani, daukaka bata cika face da wilayar Ali (AS)”.

Sayyid Muhammad Salih at-Tirmizi (Bahanafe) ya kawo littafinsa ‘Kaukabud-Durriy’ shafi na 134, daga Umar ‘Dan Khaddabi yace; Yayin da Manzon Allah (S) ya kulla alaka tsakanin Sahabbansa, sai ya dubi Ali (AS) yace: “Wannan (Ali) ‘dan’uwa na ne a Duniya da Lahira, kuma Halifa na ne a cikin iyalaina, kuma wasiyi na ne a cikin al’ummata, kuma shi ne magajin ilimi na, kuma shine magabaci a addini na (Musulunci), duk abin da yake gare shi daga ni yake, amfaninsa amfanina ne, cutuwarsa cutuwata ne, duk wanda yake son sa hakika yana so na, kuma wanda ya fusata shi hakika ni ya fusata”. 

A ‘Riyadun Nadarat’ jildi na 2, shafi na 163, an ruwaito daga Umar dan Khaddabi, cewa, wata rana Umar ya ji wani mutum yana zagin Imam Ali (AS). Sai Umar yace masa; Amma ni ban yi zaton cewa kai kana daga cikin Munafukai ba! Domin naji Manzon Allah (S) ya ce ma Ali (AS): “Kai Matsayinka a wajana kamatr matsayin Haruna ne a wajen Annabi Musa, sai dai ni babu Annabi a bayana.”

— Saifullahi M Kabir 

Wacce Nake Son Aura

Kyakkyawa ce kyau mara misaltuwa, wajen hali, sakamakon irin tarbiyar da ta samu a gidansu daga mahaifanta guda biyu. Ko ba komai, mahaifinta wani mutum ne ma’abocin addini, mai riko da koyarwar tsarkakan bayi, daidai gwargwado ya karantu, dan haka ya kasance mai aiki da abin da ya karanta. Kai in takaice muku, shi mahaifin nata irin mutanen nan ne da matansu suke musu kirari ta hanyar ce musu ‘Mazajen goyo da majanyi!’

Ka san kuwa idan har mata, wadanda aka sansu da yi wa maza kirari da cewa “Namiji ba dan goyo bane” sai ka ji wata tana cire nata mijin ta hanyar cewa shi ‘Namijin goyo da majanyi’ ne ma, kun san lallai namijin nan irin mazan nan ne da suka debi soyayyar tsakani ga Allah tun ana yarinta, har gashi ‘yarsu ta tasa ta isa aure, har ma ta sameni a matsayin saurayi, amma wancan soyayyar tasu (iyayen) na nan a matsayin budurwa, duk kuwa da tsufan da suka yi bayan tasawar kyakkyawar yarinyarsu.

A zahiri, na iya shaida cewa mahaifin wannan wacce nake so din, irin mazan nan ne da Annabi (S) yace: “Mafiya alkairin mutane daga cikin al’ummata sune wadanda ba su tsawwalawa iyalansu, kuma ba su zaluntarsu.” Saboda a iya bincikena ban taba jin ko a labarum tsegumi irin na matan gidan biki, ko kuma na mazan dandali, cewa sun taba samun sabani da matar tasa wacce yake matsanancin sonta kamar yadda take sonsa ba.

Ita ma mahaifiyar matar da nake son aura, irin wannan matan ne da Manzon Allah (S) yake cewa: “yana daga cikin dacen mutum ya samu mace managarciya.” Haka ma Amirulmuminin Ali ‘Dan Abudalib (AS) yana cewa; “Mace tagari ta fi alkairi akan mutum dubu da ba nagargaru ba.” To da gasken-gaske bincikena ya nuna min cewa ita wannan mahaifiyar tana cikin wadannan mata na gargarun da Allah ya ma sirikina baiwa da ita. 

Kai, sarkuwar tawa fa a iyakan sanina, bata yarda ta kasance daga matan nan da za su rasa maceci a ranar Lahira ba, kamar yadda aka ruwaito daga Imam Muhammad al-Bakir (AS) yana cewa: “Babu wani maceci ga mace wanda zai tseratar da ita daga Ubangijinta face yardar mijinta (a gareta).” To sarkuwar tawa ta kasance tana iyakar yinta wajen ganin ta samu yardar Allah da ta hanyar samun yardar mijinta. 

Lokaci bayan lokaci za ku ji Sarkuwata ta tara ‘yan matanta da take shirin ta aurar da su, wadanda babba a cikinsu itace wacce nake son a bani na aura, tana basu labarin cewa; “Yayin da Sayyida Fatima ta yi Shahada, mijinta, Amirulmuminin (AS) ya tsaya a kanta, yana mai cewa; ‘Ya Allah! Ni mai yarda ne da ‘yar Annabinka. Ya Ubangiji, hakika ta sauke min hakkina da ke kanta.” Sai take fadawa ‘ya’yan nata cewa wannan shaidar nake so daga mahaifinku nima, ku dage idan kun yi aure ku kasance masu neman wannan shaidar daga mazajenku.

Hakika na samu ‘yar manyan mutane, ‘yar mutunci da arziki. Ba fa arzikin kudi ba, domin kuwa Mahaifin nata ba shi da wani tarin abin Duniya, face dai Allah ya masa rufin asiri. Wannan ne ma yasa take yawan cemin, ta amince na aureta da rufin asiri na, in Allah ya nufi mu yi dukiya Shi ya so. Idan bai nufa ba kuwa arzikin da ya mana abin godewa ne. 

Ina tsananin kaunar wannan budurwar tawa saboda na taba tambayarta a wani lokaci muna ‘chat’, nace mata mene ne labari? Sai ta bani labarin wata mata da tazo tana tambayar Annabi (S) akan hakkokin miji da ke kan matarsa, sai yake ce mata: “Ta biya masa bukatarsa ko da tana cikin uzuri (lokacin da ya neman), kuma kar ta gabatar da wani abu face da izininsa, idan ta aikata ba tare da amincewarsa ba tana da dakon aikin, shi kuma yana da ladansa (aikin da ta yin mai kyau), kuma kar ta yi bacci da daddare matukar yana mai fushi da ita.” A lokacin sai take cemin, “Ina son ka zama miji na, Allah ya bani ikon sauke dukkan hakkokinka da ke kaina ko na samu kyakkyawar sakamako a wajen Allah, Ya kai Uban ‘ya’yana.”

Na sha fada mata wani Hadisin Annabi (S) da yake cewa: “Duk wanda ya ke da wata mace wacce ta ke cutar da shi, Allah ba zai karbi sallarta ba, ba kuma zai karbi duk wani kyakkyawa daga ayyukanta ba ko da ta kare zamani tana azumi, har sai ta samu yardar mijinta.” Nake cewa, bani fatan ki kasance a sahun irin wadannan matan Ya ke matar aurena.

Ya ke abar kaunata, na roke ki da ki kasance min mafi alkairin jin dadi a rayuwata. Domin na ji a hadisi Manzon Allah (S) yana cewa: “Mafi alkairin jin dadin duniya shine samun mace tagari.” Na yi miki alkawarin sauke duk hakkokinki da ke kaina bayan aurenmu gwargwadon iyawata, na daga kosar da dukkan nau’in yunwarki, tufatar da ke, ilmantarwa da kuma biyan bukatunki. Ko ba komai naga wani hadisi a cikin ‘Mizanul Hikma’ daga Manzon Allah (S) yana cewa: “Hakkin mace ne akan mijinta ya kosar mata da yunwarta, ya suturce mata al’auranta.”

Zan kuma yi kokarin zama a gareki kamar yadda Annabi (S) yake cewa: “Mafiya alkairin mutane daga cikin al’ummata sune wadanda ba su tsawwalawa iyalansu, kuma ba su zaluntarsu.” Zan yi matukar burin na tsinci kaina daga cikin wadanda Annabi (S) yake cewa: “Babu wani bawa da zai fita ya nemo abinci, sannan ya zo ya ciyar da iyalansa, face Allah ya ribanya masa a kan dukkan dirhami daya da ya ciyar da su zuwa dirhami dari bakwai.”

Ya ke abar kaunata, ina mai alfahari da zamarki Budurwata. Zan ji dadi fiye da na yanzu bayan an daura aurenmu. Fatanmu shine Allah ya bamu zuriya masu albarka, tsayayyu a tafarkin Allah, masu sallamawa ga Jagora, wakilai na gari ga addinin Allah da sakonSa.

Tunatarwa ce kawai... 

 - Saifullahi M. Kabir

 10/10/2016 

MUNA TIR DA TAKE-TAKEN GWAMNATIN TARAYYAR NA KIN BIN UMURNIN KOTU KAN SAKIN SHAIKH ZAKZAKY

TAKARDAR MANEMA LABARAI

Muna tir da take-taken gwamnatin Tarayyar na kin bin umurnin kotu kan sakin Shaikh Zakzaky

Yayin da yake mai da martani ga hirar Shugaban Dandalin yada labaranmu da sashen Hausa na BBC, Kakakin fadar Shugaban kasa a kan harkar yada labarai, Garba Shehu a ran Litinin 02/01/17 ya yi wasu kalamai masu nuna take-taken Gwamnatin Tarayya na kin bin umurnin hukuncin da babbar kotun Abuja ta 6 ta yanke na a saki Jagoran Harkar Musulunci a Najeriya, Shaikh Ibraheem Zakzaky a cikin kwanaki Arbain da biyar daga ranar da aka yanke hukuncin. Ya bayyana cewa wadansu mutane sun daukaka kara a kan hukuncin da babbar Kotun Abujar ta yanke ba tare kuma da ya ambata ko su wane ne su ba. Ya kuma ambata cewa wasu dalilai na tsaron kasa da bai bayyana takamaimai ko wadanne nen ba su ke sa ake ci gaba da tsare Shehin Malamin ba bisa kaida ba. Haka nan kuma ya nisanta Shugaban kasa a kan hannun da yake da shi cikin lamarin, a inda ya bayyana cewa lamari ne wanda ya shafi gwamnatin Jihar Kaduna.

Wannan ba shi ne karon farko ba wanda mai taimaka wa Shugaban kasa a kan harkar yada labarai ya yi kokarin nisanta hannun Shugaban kasa a kan lamarin Kisan Kiyashin da aka kaddamar a garin Zariya. Amma alal hakika babu wata hujja da za ta iya wanke Shugaban daga hannun da yake da shi a kan tsararrun hare-hare na taaddanci da ake kai wa yan uwa Musulmi na Harkar Musulunci a Najeriya a cikin daukacin kasar ta tarayyar Najeriya. Tsakanin rundunar Sojojin Nijeriya da suka fara kaddamar da kisan kiyashi a garin Zariya da kuma Hukumar Jamian tsaro na farin kaya (DSS) wadda ke tsare da Shaikh Zakzaky ba bisa kaida ba, ba  wacce take Hukumar gwamnatin Jihar Kaduna. Shugaban Kasa dai shi ne babban Kwamandan askarawan Sojojin Najeriya kuma babban Jamiin tsaro na kasa baki daya. Sai ga shi ya kasa daukar mataki a kan wadanda suka yi fatali da dokokin kundin tsarin mulkin tarayyar Najeriya gabansu gadi, ta hanyar kashe yan kasa fararen hula wadanda ba su dauke da makami tare kuma da yi wa gawawwakinsu kabari na bai daya, kamar yadda rahoton hukumar binciken kisan kiyashin Zariya (JCI) ya tabbatar. Kasantuwar Shugaban Kasa ya kasa ko da yi wa dangin wadanda aka kashe taaziyyar jajen rashin yan uwansu da suka yi, ko kuma nuna tausaya wa ga wadanda aka jikkata a yayin harin, ko da kuwa a bayan da hukumar bincike ta (JCI) ta fitar da rahoton da ya tabbatar da kisan daruruwan yan kasa fararen hula da jamian tsaro Sojoji suka yi, alhali kuma shi ne babban kwamandan askarawa, ba zai iya tsame hannunsa a cikin wannan taannuti ba.

Dadin dadawa kuma, Mai taimaka wa Shugaban kasa sai ya nuna jahilcin cewa Antoni-janar na tarayyar Najeriya, wanda yana cikin wadanda ake kara kan tabbatar da hakkin Shaikh Zakzaky, Ministan Tarayya ne da ke wakiltar Shugaban kasa a cikin wannan kara. Haka nan kuma, irin girma da fadin hare-haren taaddancin da ake kaddamarwa a kan yan uwa Musulmi na Harkar Musulunci a Najeriya (IMN), ai bai tsaya a iya cikin Jihar Kaduna ba, amma wani tsararren shiri ne da wasu jihohi suke taimakawa a sarari wajen aiwatarwa. Salon harin taaddancin da aka yi amfani da shi a Kano, Jos, Sakkwato, Funtuwa da kuma Kaduna ai ba lamari ba ne wanda ya shafi jihar Kaduna ita kadai ba, kamar yadda Garba Shehu ya yi ikirari. Don haka a sani lallai ba za a yaudare mu da shirun da gwamnatin tarayya ta yi ba a kan wannan lamari na tsawon sama da shekara guda.

Mai taimaka wa Shugaban kasar ya yi kuma kokarin danganta tsare Shaikh Zakzaky da batun da ya shafi wasu zarge-zarge marasa tushe na tsaro. Wanda kuma dama wannan dalilin shi ne wanda mahukunta suke bayyanawa a duk lokacin da ruwa ya karewa dan kada. Ta yaya ne bin umurnin kotu na sakin wanda aka tsare a boye na tsawon sama da shekara guda zai iya zama barazana ga shaanin tsaro? Mun yi amannar cewa babu wani batu na shaanin barazana ta tsaro da zai sanya a ci gaba da tauye wa Shaikh Zakzaky yancinsa. Hukumomi sun kasa aza wani laifi a kan Shaikh Zakzaky da iyalinsa a tsawon shekara guda da ya yi a tsare.

Da yake bayyana dalilin da ya sanya ba su bi ba, kuma ta yiwu ba za su bi umurnin kotun ba, ya ce wasu mutane sun daukaka kara a kan hukuncin, amma kuma ya kasa bayyana su waye su kuma bisa wane dalili. Abin sani dai a nan shi ne, mujarradin daukaka kara kawai ba zai iya dakatar da zartar da umurnin waccan kotun ba, sai dai kawai idan wata babbar kotu ce ta bayar da umarni a kan haka. Haka nan kuma bai iya bayyana wani umurni da aka fitar ba wanda ya ci karo da wannan hukunci na sakin Shaikh Zakzaky da Kotu ta bayar ba, duk kuwa da cewa waadin sakinsa na kara kusantowa. A sarari yake cewa gwamnatin dai tana so ta yi wasa da hankalin jamaa ne kawai.

Mun yi amannar cewa maimakon hakan, fadar Shugaban Kasa tana bukatar ta bi umurnin kotu na a gaggauta sakin Jagoranmu, Shaikh Ibraheem Zakzaky a matakin farko, maimakon musanta hannun da tabbas tana da shi a cikin lamarin kisan kiyashin da aka kaddamar a garin Zariya, ko fitar da wasu damuwa na ba gaira ba sabat kan shaanin tsaro. A dai yi mu gani, domin kuwa al'umman duniya suna ji kuma suna gani.

SA HANNU:

IBRAHIM MUSA

SHUGABAN DANDALIN YADA LABARAI NA HARKAR MUSULUNCI A NAJERIYA

07/01/2017

Skype: Ibrahim Musa42

Fassara daga Zaharaddeen Sani Malumfashi

Ranar 8 Ga Rabi'ul Akhir;

Ranar 8 ga watan Rabi'ul Akhir, a shekara ta 232 aka haifi Mahaifin Limaman Zamaninmu, Tsarkakakke Imam Hasanul Askari (AS). 

A irin wannan ranar ta 8 ga Rabi'ul Akhir, ina taya Maulana Sahibul Asr Waz Zaman, Imam Mahdi (AJ) murnar zagayowar wannan ranar ta farin ciki. Haka ma ina taya dukkan Ahlulbaiti da jikokinsu Shurafa tare da daukacin masoya masu karimci murnar wannan rana mai albarka. 

Dafatan za a gudanar da ayyukan alkairi Don tuna wannan rana ta haihuwar daya daga cikin Imamai Ma'asumai Tsarkaka. 

—Saifullah M Kabir 

YAU NE RANAR SHAHADAR LIMAMIN TSIRA NA 11

A rana mai kamar yau, 8 ga watan Rabi'ul Auwal, a shekara ta 260 ne Halifan Manzon Allah (S) na 11, Baban Imam Mahdi, wato Imam Hasan Bin Ali Al'askariy (AS) ya yi Shahada. 

Imam ya yi Shahada ne a kurkukun barikin soji na Banul Abbas, bayan da aka shayar da shi guba Don a ga bayansa a huta, bisa tsoron kar ya haifi Imam Mahdi (AS) wanda hadisai da Dama suka nuna cewa shine mai daukar fansar wadanda aka raunata (Ahlu Muhammad (S), akan azzaluman farko da na karshe. 

Ina mika jaje ga al'umma baki daya, musamman ga Shugaban zamaninmu, Imam Mahdi (AJ) dangane da zagayowar wannan rana ta wafatin Mahaifinsa mai girma. Ta'aziyyar musamman ga Jagora, Sayyid Ibraheem Zakzaky dangane da Wannan rana ta rashin Mahaifin Limamin zamaninmu. 

La'antar Allah akan makasan Iyalan Annabi da Shi'arsu har tashin Alkiyama. 

— Saifullahi M Kabir 

8 Rabi'ul Auwal 1438

RANAR 6 GA WATAN RABI'UL AUWAL

A rana mai kamar yau ne, 6 ga Rabi’ul Auwal shekara ta 11 bayan hijira, kwanaki 5 da bizne gangar jikin fiyayyen halitta, Annabi Muhammad (S), ‘yarsa, Sayyida Fatima Azzahra (SA) ta fara ziyartarsa a makwancinsa mai albarka.

Manzon Allah (S) ya yi wafati a ranar Litini 28 ga watan Safar ne, Amirulmuminin Imam Ali ‘Dan Abudalib ya yi masa wanka da sutura sannan ya jagoranci janazarsa ya kamala a yammacin Talata, ranar Laraba 1 ga wata da safe ya bizne shi a muhallin da ya cika Allah ya kara masa aminci da tsira.

Sheikh Saduk ya kawo a Amalinsa, shafi 99-101 da Alhamiyuni a cikin Fara’idus Simdain, jildi na 2, shafi 34 da 35, daga Manzon Allah (S) yana wasiya ga Amirulmuminin (AS), yake ce masa: “Ita kuwa ‘Ya ta Fatima, wacce ta kasance itace shugaban matan talikai, a yayin da na ganta sai na tuna da abubuwan da za su faru da ita bayan bana nan. Kamar ina ganinta a yayin da kaskantacce zai kusa cikin dakinta, ya keta alfarmarta, a kwace mata hakkinta, a kuma hanata gadonta, a kassara mata tayin da ke cikinta, a barar da cikinta. A wannan halin za ta kasance tana kira tana cewa; ‘Ya Muhammadaa!’ Amma ba za ta ji amsa ba. Za ta nemi dauki, amma ba za ta samu mai taimako ba. Za ta wanzu a bayana tana cikin bakin ciki da damuwa, kuma mai yawan kuka. Za ta kasance kamar wacce aka kaskantata bayan kuwa a lokacin rayuwar mahaifinta ta kasance mai daukaka.”

Manzon Allah (S) ya ci gaba da cewa: “Za ta kasance farkon wacce za ta sadu da ni a cikin Ahlulbaiti na bayan na tafi. Za ta riske ni a cikin damuwarta kuma tana raunatacciya wacce aka bakantawa rai, wacce akawa kwacen hakkinta, kuma wacce aka kashe ta.”

Sannan sai Manzon Allah (S) yace: “Allah ka la’anci wanda ya zalunceta, kuma ka yiwa wanda ya fusata ta azaba, ka kaskantar da wanda ya kaskantata, kuma ka dauwamar da wanda ya barar da tayin cikinta a wutarKa.” A daidai wannan lokacin sai Mala’iku suka amsa addu’ar Manzon Allah (S) da ‘Ameen’.

Babu wani abu da Manzon Allah (S) ya fada zai faru da wannan diyar tasa mai girma da bai auku ba. Kai sun ma yi gaggawar afkar da shi ne. Kamar suna jira ya cika ne su fara shirin aiwatar da wadannan mugayen nufin nasu. Kamar kuma suna jira ne Imam Ali (AS) ya kammala Janazarsa ya bizne shi a safiyar wannan Larabar, su kuma su dira akan wannan diyar tasa a gidanta a yammacin ranar Larabar!

Wannan diran da suka yi a karkashin wani mutum da ake wa lakabi da ‘Dan Sahhaqu, wanda ya auku a ranar Laraba 1 ga Rabi’ul Auwal, shine dalilin da ya kwantar da Sayyida Zahra (SA) ta fara jinyar raunin da suka mata na bugun kirjinta da karfen bayan kofar dakinta, suka sa ta yi barin dan cikinta, hakan yasa bata iya samun sukunin ta tashi ta tunkari kabarin Mahaifinta ba sai bayan wadannan kwanakin.

Ta je gareshi tana mai zubar da hawaye, tare da rakiyar mijinta Amirulmumin (AS) tana dafe da ‘ya’yanta Hasanain (AS) da Zainabul Kubra (SA), a yayin da baiwarta Fidda ke rike da ita. 

Kamar ina jiyo kukan Kakata Sayyida Zahra (SA) a kan kabarin Shugaba (SA) tana rera masa koken irin zaluncin da wadanda ya musu wasiya da su bi ta sukai mata.

Ina tayaku jajen wannan rana ya ku Muminai. Ina hawaye da kuka ga abin da akaiwa Kaka mai girma ga Imamul Asr (AS). Tare da tawassul ga wannan jarabawar tata, akan Allah ya gaggauta hallaka mana Elrufa’I da Buhari da duk mai goyon bayansu ko mai tayasu aikin zaluntarmu a daidai wannan lokacin. Allah ya shudar da su kamar yadda ya shudar da Azzaluman farko!

— Saifullahi M Kabir